VAPINGUM

VAPINGUM

Galliae Narbonens. urbs. Antonin. olim Caturigum, an Trecoriorum caput, nunc in Delphinatu, in confinio Provinciae. Satis munita. Gap Simlero, Episcopalis est sub Archepiscopo Aquensi, cum arce Puymore in colle, vix 2. leuc. ab Isara fluv. 7. a Segusterone in Boream 6. ab Ebreduno in Occasum. In veterib. Notit. quinta ponitur, inter civitates provinc. Narbonensis secundae. Data fuit a Guilielmo VI. Comite Forcalquerio, dotis locô, nepti suae Beatrici, nuptae Guidoni Andreae Delphino Viennensi, A. C. 1202. nihilominus etiam multum hîc iuris veteres provinciae Comites habuerunt. Subest, ut dictum, Metropol. Aquensi in Provincia. S. Demetrius ex antiquissimis eius Episcopis est, ut et Constantius, qui interfuit Concilio Eponensi. Sic Concilio Aurelianensi quinto Vellesius, nec non Synodo Parisiensi secundae, Concilio Parisiensi quarto Sagittarius, Concilio Matiisconensi 2. Aredius, Concilio Cabillonensi Potentissimus interfuêre. Celeberrima hîc a Reformatis synodus A. C. 1603. celebrata est, ad quam omni ex regno, etiam externi Ministri, confluxerunt. Actum in ea non tantum de disciplina, sed etiam doctrina. Confessio Gallica approbata; de scissura inter Lutheranos et Refomatos deliberatum, conclusumque ut acerbitas ingeniorum per scripta virulenta magis magisque inardescens mitigaretur: scriptae Synodales literae, quae non tam acerbitatem illam lenierunt, quam Brandeburgici Electoris ditionem ad partes Reformarorum pertraxerunt: decretum item, ad Confessionis recitatae capita adderetur, Pontificem Rom. Antichristum esse, eique notas a Daniele et Apostolo designatas convenire Porro moniti sunt Pastores, ut inter contionandum parcius auctoritate Patrum et Scholasticorum testimoniis uterentur, purumque Dei verbum pro unico fundamento haberetur, etc. Vide thuan. Histor. l. 29. Duchesnium Rech. des villes de France. Bouchaeum, Hist. de Prov. Rufium, Hist. des Comtes de Prov. c. 5. nombr. 21. Chorerium, Hist. Delphin. Morerium, Diction. Histor. Laetum, Comp. Histor. Univ. etc. Caput est pagi cognom. Gall. le Gapencois, qui regio Tricoriorum, Plinio l. 3. c. 4. vocatur, hi Τρικόριοι Straboni nuncupati, ab eo inter Vocontios et Medullos ponuntur. Saltus Tricorios memorat Ammianus. Hâc Annibali in Italiam iter fuit, qui Vapincas et Tricorios emensus Druentiam transiit, sita autem urbs est ad amniculum in Druentiam effluentem, Hadrian. Vales. Notit. Gall.